Rusiya, Qərbin kosmik üstünlüyünü zəiflətmək məqsədilə yeni bir peyk əleyhinə silah inkişaf etdirir. Associated Press agentliyinin NATO kəşfiyyatına istinadən verdiyi məlumata görə, yeni silah, Starlink peyklərini hədəf alaraq onların fəaliyyətini pozmağı hədəfləyir.
Korrekt.az xəbər verir ki, bu silah, Starlink orbitlərini miniatür mikropartiküllərlə doldura bilən bir sistemdir. Bu hissəciklər, eyni anda bir neçə peykə ciddi zərər verə bilər, xüsusilə onların günəş panellərinə ziyan vuraraq peyklərin fəaliyyətini dayandırmağa səbəb ola bilər. Həmçinin, bu sistem kosmik zibil yarada bilər ki, bu da Rusiya və Çin daxil olmaqla digər orbital sistemlər üçün ciddi təhlükə yaradır.
Analitiklər, belə bir silahın böyük miqyaslı ziyanlara yol açacağını və bunun kosmosda geniş fəsadlar yaradacağını bildirir. Lakin, kəşfiyyat mənbələri, bu silahın istifadəsinin real olmasına şübhə ilə yanaşır və belə bir silahın daha çox təzyiq və qorxutma vasitəsi kimi istifadə oluna biləcəyini qeyd edirlər.
Yeni sistemin yerləşdirilmə müddəti hələ də məlum deyil, lakin kəşfiyyat mənbələri onun aktiv inkişaf mərhələsində olduğunu bildirir. Təfərrüatlar isə məxfi saxlanılır.
Rusiya tərəfindən hazırlanan bu “kosmik xaos” silahı, mövcud vəziyyətin daha da gərginləşməsinə səbəb ola bilər.
