ABŞ Prezidenti Donald Trampın administrasiyası 80 minədək saxlanılan miqrantın yerləşdirilməsi üçün yeddi böyük mərkəzin tikintisini planlaşdırır. Korrekt.az xəbər verir ki, bu barədə Washington Post qəzeti məlumat yayıb.
Nəşrin yazdığına görə, layihənin icrası üçün ABŞ hakimiyyəti ölkənin immiqrasiya saxlanma sisteminin yenilənməsinə kömək edəcək podratçı şirkətlər axtarır. Tender sənədlərinə əsasən, eyni vaxtda 80 mindən çox insanı qəbul edə biləcək sənaye obyektlərinin yenidən təchiz edilməsi nəzərdə tutulur.
Plana görə, saxlanılan miqrantlar əvvəlcə bir neçə həftə ərzində xüsusi emal və qeydiyyat mərkəzlərində saxlanılacaq, daha sonra isə yeddi iri kompleksdən birinə köçürüləcəklər. Hər bir mərkəz 5–10 min nəfər üçün nəzərdə tutulacaq və burada miqrantlar deportasiya prosesinə hazırlanacaqlar.
Yeni saxlanma mərkəzlərinin Virciniya, Texas, Luiziana, Arizona, Corciya və Missuri ştatlarında əsas logistika qovşaqlarının yaxınlığında yerləşdirilməsi planlaşdırılır. Bundan əlavə, hər biri 1500 nəfərə qədər insanı qəbul edə biləcək 16 əlavə obyektin də inşası nəzərdə tutulur.
Washington Post qeyd edir ki, bu proqram Tramp administrasiyasının miqrantların kütləvi saxlanılması və deportasiyası siyasətinin növbəti mərhələsi kimi qiymətləndirilir.
Tender elanında bildirilir ki, yeni müəssisələr sistemin səmərəliliyini artırmalı, xərcləri azaltmalı, saxlanılma və sənədlərin işlənməsi müddətini qısaltmalı, deportasiya proseslərini sürətləndirməli və eyni zamanda saxlanılan şəxslərin hüquqlarına hörmət olunmasını təmin etməlidir.
Məlumata görə, mərkəzlər vanna otaqları, mətbəxlər, yeməkxanalar, tibb bölmələri, istirahət zonaları, hüquq kitabxanaları və inzibati ofislər ilə təchiz olunacaq. Obyektlərin bir hissəsi ailələrin yerləşdirilməsi üçün uyğunlaşdırılacaq.
