Liviyanın Baş Qərargah rəisi Məhəmməd Əli Əhməd əl-Həddadı daşıyan şəxsi təyyarə Türkiyə ərazisində qəzaya uğrayıb. Korrekt.az xəbər verir ki, bu barədə Liviyanın Baş naziri Əbdül Həmid əl-Dbeyba rəsmi açıqlama verərək generalın həlak olduğunu təsdiqləyib.
Məlumata görə, Falcon 50 tipli, 9H-DFJ qeydiyyat nömrəli biznes təyyarəsi dekabrın 23-ü axşam saat 20:10-da Ankaranın Esenboğa Hava Limanından Tripoli istiqamətində havaya qalxıb. Türkiyənin daxili işlər naziri Əli Erlikayanın bildirdiyinə görə, saat 20:52-də təyyarə ilə dispetçer əlaqəsi kəsilib.
Nəşrlərin məlumatına əsasən, təyyarə Hyman bölgəsində təcili eniş etməyə cəhd göstərib, lakin bundan sonra onunla əlaqə bərpa olunmayıb. Daha sonra hava gəmisinin qalıqları Ankaranın Kesikkavak kəndindən təxminən 2 kilometr cənubda aşkar edilib.
Təyyarədə ümumilikdə beş nəfərin olduğu bildirilir. Türkiyə rəsmiləri arasında aparılan araşdırmalar nəticəsində qəzanın detalları dəqiqləşdirilir.
Qeyd edək ki, Məhəmməd Əli Əhməd əl-Həddad hadisə baş verən gün Türkiyədə rəsmi səfərdə olub. O, Türkiyə Baş Qərargah rəisi, ordu generalı Səlcuq Bayraktaroğlunun dəvəti ilə Ankarada görüşlər keçirib. Liviya ordusunun generalı ölkənin təhlükəsizlik sistemində əsas fiqurlardan biri hesab olunurdu.
Hadisə ilə bağlı həm Türkiyə, həm də Liviya tərəfi araşdırmaları davam etdirir.
