Brukinqs İnstitutunun Strob Talbott Təhlükəsizlik, Strategiya və Texnologiya Mərkəzinin xarici siyasət üzrə eksperti və keçmiş diplomat Filip Qordon Türkiyənin ABŞ və Avropa arasında yaranmış Qrenlandiya gərginliyində mühüm rol oynaya biləcəyini bildirib.
Korrekt.az xəbər verir ki, Qordon Davosda ABŞ Prezidenti Donald Trampın çıxışını şərh edərək, Trampın mövqeyinin Avropa tərəfindən aqressiv və tənqidi qəbul edilsə də, danışıqlar üçün müəyyən imkanlar yaratdığını qeyd edib. O, Avropanın Trampın Qrenlandiya ilə bağlı hərbi güc tətbiq etməyəcəyinə dair açıqlamasını alqışlayacağını vurğulayıb və bu vəziyyətin hər iki tərəf üçün zərərli ola biləcək eskalasiyanın qarşısını almağa imkan yaratdığını bildirib.
Qordon, Türkiyənin bu gərginlikdə körpü rolunu oynaya biləcəyini qeyd edərək, xüsusilə transatlantik münasibətlərin pisləşdiyi bir dövrdə Ankara üçün mühüm səs olduğunu bildirib. Onun sözlərinə görə, Türkiyə həm ABŞ ilə yaxşı münasibətləri qorumağa, həm də müstəqil siyasət yürütməyə çalışaraq vəziyyəti stabilləşdirə bilər.
Davosda çıxış edən Tramp isə Qrenlandiya ilə bağlı hərbi müdaxilə etməyəcəyini açıqlayıb və ABŞ-ın Qrenlandiyanı alma ehtimalını müzakirə etdiklərini söyləyib. Tramp, Avropanın iqtisadi vəziyyətinin zəif olduğunu iddia edərək, bəzi Avropa ölkələrinə tariflərin tətbiq olunacağını açıqlayıb.
Bunun nəticəsi olaraq, Avropa Birliyi ABŞ ilə 2025-ci ilin iyulunda yekunlaşdırılması planlaşdırılan ticarət sazişinin təsdiqləmə prosesini dayandırıb. Tramp isə 1 fevral 2026-cı il tarixindən etibarən bəzi ölkələrə 10%, iyun ayından sonra isə 25% dərəcəli gömrük tariflərinin tətbiq ediləcəyini açıqlayıb. Bu tariflərin Qrenlandiyanın alınması ilə bağlı razılıq əldə olunana qədər qüvvədə qalacağı bildirilib.
